നാളേയ്ക്കുള്ള ചില പെണ്‍കരുതലുകള്‍

പ്രസിഡണ്ടാണ്‌ വിഷയം നിര്‍ദ്ദേശിച്ചത്‌
ഇതില്‍പ്പരം റെലവണ്റ്റും സ്യൂട്ടബ്ളും ആയ
സബ്ജെക്റ്റ്‌ ഇനിയെന്തുള്ളൂ എന്ന്‌
സെക്രട്ടറി സെക്കന്‍ഡ്‌ ചെയ്തു
അഞ്ചംഗക്കമ്മിറ്റിയുടെ കൈയ്യടിയോടെ
അങ്ങനെ സെമിനാര്‍ റ്റോപിക്‌
തീരുമാനിയ്ക്കപ്പെട്ടു.

അബലയെന്നും ചപലയെന്നും
കണ്ണീര്‍ത്തുടരിലെ നായികയെന്നും
സ്ഥിരമായി അടയാളപ്പെടുത്തിയും
ചര്‍വിതചര്‍വണങ്ങള്‍ മാത്രം ചെയ്തും
പീഡിപ്പിയ്ക്കുകയാണ്‌
ഈ ആണ്‍കോയ്മയുടെ സമൂഹം
എന്നും നാടിന്റെ വികസനവഴികളില്‍
മുന്‍നടക്കാന്‍ സ്ത്രീകള്‍ക്ക്‌ പ്രാപ്തിയുണ്ടോ?
എന്ന വെല്ലുവിളി ഏറ്റെടുക്കുകയാണ്‌
ഈ വനിതാദിനത്തില്‍
ഉയര്‍ന്ന ചിന്താഗതിക്കാരായ
നമ്മെപ്പോലുള്ളവര്‍ക്ക്‌ കരണീയമെന്നും
അല്‍പസ്വല്‍പം ഭാഷയുടെ അസ്കിതയുള്ള
ഉപകാര്യദര്‍ശി ചൊല്ലിയാടി

സമയബോധം വളരെ മസ്റ്റ്‌ ആയതുകൊണ്ട്‌
റ്റൈം മാനേജ്മണ്റ്റ്‌ ഹാന്‍ഡില്‍ ചെയ്തുകൊള്ളാമെന്ന്‌
സല്‍വാറിന്റെ നെറ്റഡ്‌ മേലാട
ഒന്നുകൂടി വലിച്ചിട്ട്‌
കീഴേ മാറുയരത്തിലേയ്ക്ക്‌ ഒളികണ്ണിട്ട്‌
ആത്മവിശ്വാസമുറപ്പിച്ചു ട്രഷറര്‍ .

ഫ്യൂച്ചറിലേയ്ക്കുള്ള പ്ളാനിംഗില്‍
കിച്ചണ്‍ മാറ്റിനിര്‍ത്തിയാല്‍ എങ്ങനെയാണെന്നും
വിഷയം തന്റെ കൈയ്യില്‍ സേയ്ഫ്‌ എന്നും
മുടമ്പല്ലില്‍ കുരുങ്ങിപ്പോയ ചില്ലിചിക്കന്‍
സൂക്ഷ്മതയോടെ കുത്തിയെടുത്ത്‌
വാക്കിനൊപ്പം ചവച്ചുതുപ്പി
വൈസ്പ്രസിഡണ്ട്‌

ചെലവിന്റെ പെണ്‍കരുതലുകള്‍ കണ്ടും കേട്ടും
അസ്തപ്രജ്ഞരായ കാണികളെ
താന്‍പോരിമയോടെ നോക്കുന്ന
വേദിയിലെ സിംഹികളെ
സ്വപ്നത്തില്‍ കണ്ട്‌
അഞ്ചു വനിതകള്‍ നിര്‍വൃതിപൂണ്ടു

പ്രസംഗങ്ങളില്‍പരിചയമില്ലാത്ത,
പ്രായോഗികബോധം കൂടിയ
ആറാമതൊരുവള്‍
മറ്റൊരു കരുതല്‍സാദ്ധ്യത
അന്നുരാത്രിതന്നെ
അവര്‍ക്കു മുന്നില്‍ തുറന്നിട്ട കാര്യം
മാര്‍ച്ച്‌ എട്ടിലെ പത്രങ്ങള്‍
പ്രാദേശികപേജ്‌ നിവര്‍ത്തി
അവരെയും അറിയിക്കുമായിരിക്കും



സുഗതകുമാരിറ്റീച്ചര്‍ക്ക്‌..

90 ലെ ആ പെണ്‍കുഞ്ഞിനു ഇപ്പോള്‍ വയസ്സ്‌ 19.
അവളുടെ അമ്മയുടെ അനേകം ഉല്‍ക്കണ്ഠകളില്‍ ഒന്നു സംഭവിച്ചു.
അതുകൊണ്ട്‌ അവള്‍ ആവര്‍ത്തിക്കുന്നു ,ഈ 2009 ലും.
ആ അമ്മയും .....
ഒപ്പം 90 എന്ന വാല്‍ ഉപേക്ഷിച്ചുകൊണ്ട്‌റ്റീച്ചറുടെ കവിതയും...*

പെണ്‍കുഞ്ഞ്‌ 90 എന്ന കവിത


*